“Pa qejf ” por me stil

Më pëlqen kjo shprehje “pa qejf”. A nuk është e mrekullueshme? Është një nga ato shprehjet të pakta shqipe që ka konceptin e privacitetit në të. Nëse dikush të përgjigjet “pa qejf” do të thotë se nuk po ndihet mirë fizikisht por nuk është tepër keq. Apo, është shumë keq por nuk ka dëshirë t’ia shpallë gjithë botës, praktikisht po thotë nuk dua të flas për këtë. Do të thotë edhe dhe se nuk është mirë emocionalisht, ka pasur një ditë të keqe. Ose siç më ndodh shpesh mua janë të gjitha këto bashkë! Fjala pa qejf të bën të mos ndihesh e mjerë dhe të mbulon me hir. Mbi të gjitha të shpëton nga detajet.

Një herë që kemi shpëtuar nga të tjerët, duke ikur me lezet me një – Jam pa qejf sot, të marr unë.- Duhet të bëjmë llogaritë me veten.

Njenja e fajit

Në momentin që anulojmë diçka sepse jemi sëmurë, apo pa qejf, një ndjenjë faj zakonisht nuk do të lejojë të rrimë rehat as atë ditë të shpifur me temperaturë. Fillojmë mendojmë se mund të kishim duruar, çfarë do të mendojnë të tjerët? Mendojmë për të gjitha gjërat nuk do të arrijmë të bëjmë.

Mentaliteti i dhembjes

Shtrihemi ndoshta pa menduar dhe presim shërimin në mëshirë të fatit. E vetmja gjë ndoshta, pijmë një qetësues. Sigurisht që duhet të mësojmë të bëjmë diçka për t’ia lehtësuar vetes dhembjen. Sikur thjesht mendërisht.

Nuk ka pse të jesh mjeran vetëm se je pa qejf. – artikull i mëparshëm

Nëse je shumë keq, kujdesu vërtet për veten. Duke u vizituar tek doktori, apo thirrur një person të dashur. Nëse është diçka kalimtare nuk është nevoja të bluash mendime negative për veten. Është veç një ditë, do të kalojë. Gjumi, mjekimet e duhura dhe pak humor bëjnë mrekullira. Shijoje ditën tënde. Mund të mbarosh me në fund atë romanin që ke lënë gjysëm, mund të shohësh video gazmore, apo të dehesh me luksin e gjumit. Pij çaj dhe shijoje jetën edhe “pa qejf”.

Pa qejf por me stil …

Advertisements

Organizimi-Listat

Jam e fiksuar pas listave! Bëj lista për çdo gjë. Zakon që kam pasur që fëmijë. Bëj listë pazari sipas kategorive. Lista të dëshirave, të punëve, të njerëzve që duhet telefonoj apo të shkruaj. Lista e aktivitetëve të ditës. Kur udhëtoj bëj një list të gjërave që dua të marr me vete. Madje dhe të gjërave që dua të shoh, ndoshta ekzagjeroj pak…Sinqerisht më ndihmon shumë të mbaj nën kontroll kohën dhe ekonominë.

Nëse vërtetë nuk ke bërë kurrë një listë do të thotë se veçanërisht ke nevojë të fillosh.

Nuk kam kohë të rri të shkruaj-thua?Ndodh që pikërisht personi që nuk ka kurrë kohë të shkruajë një listë ka kohë të kthehet 3 herë tek dyqani për shkak të harresës. Sikurse ai që nuk ka para përfundon të blejë çfarë i del para … duke shpenzuar dyfishin e pa u ngopur.

Lista është hapi i parë drejt organizimi

Listat-Pixabay

Picture credit by Pixabay

Lista shpëton kohë, para dhe mund!

Etika në rrjet- Komentet

Të komentosh në rrjete sociale mund të jetë shumë zbavitëse dhe madje dobiprurëse. Zbavitëse sepse në disa raste mund të hapen tema shumë qesharake me persona që kanë të njëjtën shije humori me tëndin. Shpesh gjej veten duke bërë gallat me miq në Instagram,  çdo gjë nisur nga një koment i goditur. Dobiprurëse sepse komentet  të çojnë në komunikim me klientë të mundshëm, lidhesh me personat që kanë të njëjtat interesa pune, dhe mbi të gjitha merr feedback të postimit. Kjo vlen sidomos nëse ke një profil bisnesi apo pune.  Pra, nëse përdor rrjete sociale komenti bëhet pjesë e domosdoshme.

Për sa i përket pjesës zbavitëse,  ki kujdes, pasi jo të gjithë kemi të njëjtin lloj humori. Nja dy herë më ka ndodhur të shkruaj komente krejtësisht të pafajshëm por që marrësi nuk i ka perceptuar siç mendoja. Nëse ke një profil publik, të hapur, apo bisnesi, ki kujdes me komentet pasi ato mund të ulin nivelin profesional të faqes. Nëse e ke të mbyllur vetëm për miq,  normale që një sqarim i shpejtë mund të mjaftojë. Është gjithësesi bukur të përdorim komente me edukatë kundrejt të gjithëve. Kujdesi paraprak do të shmangë keqkuptimet dhe . . . nuk harxhon kohën kot.

Nëse ke një profil publik, komentet duhet të jenë të  menduara mirë. Zgjidh me kujdes se në cilën faqe po komenton. Fjalët duhet të jenë të shkruara saktë dhe sa më profesionalisht. Aktiviteti yt i menduar mirë mund të përbëjë  suksesin e faqes tënde. Do të tërheqë shikuesit e duhur, ndjekësit e duhur dhe me rradhë klientët e duhur. Shmang polemikat, shmang kritikat, mos shaj kurrë!

Gjithashtu, kur sheh diçka që ia vlen, mos ki frikë të shkruash një koment pozitiv. Mbase ai koment mund të ndryshojë ditën apo të përmirësojë punën e dikujt tjetër!

etikanerrjet - Copy (4)

Etika në rrjet- Report!

Report do të thotë raporto. Do të thotë të lajmërosh se  një imazh apo postim është kundër rregullave të rrjetit social. Mund të ketë imazhe të vjedhura apo të papërshtatshme madje dhe mizore. Nëse ti përdor mundësinë  që të raportosh  je duke vepruar drejtë. Kjo ndihmon  që rrjeti social të jetë më pozitiv për të gjithë. Nëse e bën këtë aq më pak imazhe apo materiale të papëlqyeshme do të qarkullojnë.

Mos u mjafto duke bërë block, mendo edhe për të tjerët.  Asnjë nuk do ta marrë vesh që ke qënë ti.  Ankohemi nga imazhe të shpifura, por pak e shtypim atë të shkretin buton për t’i ndalur. Ji i përgjegjshëm, kjo  do të bëjë të mundur pakësimin e plehrave në rrjet, e kështu do të kënaqesh më shumë ti edhe të tjerët!

hajdeseflasim etikanërrjet
Report nëse duhet!

2018

Po ti e ke bërë listen  tënde? Kur bën një list synimesh prirja  është  të jemi  shumë  kërkues  me veten. Mos ji tepër  kërkues. Përqendrohu  tek gjërat që ke vërtetë në dorë, që të përkasin  ty. 

Pse është  mirë të bësh  një list?  Të ndihmon të mbash “fokusin” aty ku duhet. Të ndihmon  të njohësh  veten. Rrit respektin  për veten, pasi sheh që ia del. Të bën  të vetëdijshëm se je gjithmonë duke mësuar.

Në autobus – Dehje 

Gjithë ai burrë lëshonte era raki. I skuqur, sytë e fryra, i enjtur. Më mori  lekët, nuk më ktheu kusur. U kujtua pas disa minutash u kthye … po bileta hiç. Heshta. Nuk mund të merresha me të. Alkoli nëpër damarë i kishte dhënë një të drejtë të heshtur për të bërë çfarë të donte. Disa njerëz nënqeshnin, ulnin  kokën, e ç’të bëjnë tjetër. Rakisë i hapet rrugë. Duhet marrë me të mira. I transformon njerëzit në një estradë që për të qeshur  mua nuk më bën. Çudi që pijaneci ka një vend gati folklorik në sytë e popullit.

Krijohet një justifikim injorant se i dehuri mund të shkelë ligjin, mund shkelë njerëzit përreth, mund të rrahë gruan, mund të harxhojë paratë kot. Dhe e gjithë kjo nën një hije  gazmore të urryeshme.

Keq më erdhi. Për të? Jo për ne. Për atë xhaxha me republikë që iu revoltuan zorrët kur s’desh më dha kusurin. Për atë djalin xhentil që më bëri me shenjë si për të thënë “është tapë … mos u ndjej”. Më erdhi keq për atë grua me të cilën ky fliste përçart. Më erdhi  keq për veten që mu desh të duroja aromën e rëndë të një realiteti të shpifur.

Ku i dehuri mjerisht bënka ligjin dhe ne duhet edhe të qeshim.

Picture by Pixabay

Organizimi nuk është fiksim

Disa mendojnë se njerëzit e organizuar janë të ftohtë, të ngurtë dhe strikt. Mirë, nuk është aspak kështu. Organizimi të lejon të rregullosh aktivitetet  në mënyrë spontane. Nuk do të  thotë  të jesh i  fiksuar! Jeta ka surpriza dhe është bukur  ti presësh krahë hapur.

Ti je më i  rëndësishëm se pluhurat! Relaksohu! Miqtë  janë  më  të rëndësishëm se pazari. Qetësohu! Bashkëshorti apo familja  janë më të rëndësishëm se xhamat e palara. Ndalo! Gëzo jetën!

Fiksimi  për të bërë çdo gjë dhe  mirë të tret dhe dëshira  për  të  jetuar  si në  një  faqe katalogu, të pastër  si spital  të sfilit.  E di çfarë?  Mërziten edhe ata që të rrethojnë. Merr  kohë  për veten  dhe njerëzit  që  do.

Relaksohu, lejoji  vetes  një  rrëmujë të ëmbël  tek tuk. Prishe  programin  ndonjëherë  për  të ndenjur  me një mik që ka nevojë. Prishe rutinën për të shijuar  surprizat  e jetës.

Thuaji  po jetës!

Organizimi do planifikim

Një plan i mirë të jep  liri. Si?  Kur e di çfarë duhet  të bësh  tashmë  ndihesh  më i qetë. Plani  duhet të pasqyrojë aktivitetin  tënd  por dhe tipin. Nëse je tip spontan  dhe i/e çlirët  mos ekzagjero  me programin. Do të zhgënjehesh  nëse  nuk arrin  të bësh  çdo  gjë. Nëse  je tip  strikt, jepi!  Mos harro ama  të shtosh  në planin  tënd  dhe zbavitjen!

Ndaje  planin  tënd sipas  kohës së zbatimit.

  • Çdo ditë
  • Çdo javë
  • Çdo muaj
  • Çdo vit

Gjërat  kryesore në një shtëpi  mund të ndahen në  tre grupe

  • Blerjet dhe gatimi
  • Pastrimi
  • Larja dhe hekurosja  e rrobave

Vendose një ditë për çdo  aktivitet. Për shembull unë përpiqem  që një herë në javë të merrem  me hekurin, të martave. Mjafton 1 ose 2 orë. Nëse e bëj rregullisht  mali  i rrobave bëhet  kodër  e nga kodër  në fushë!

Plani  të duhet  edhe  në blerje. Mbaj një listë të sendeve  që i duhen shtëpisë gjithmonë.  Lista  të kursen  kohë dhe para.

Unë mbaj  një listë të  përhershme për çfarë duhet. E ndaj në Ushqimore, Pastrimi, Kozmetike. Në këto  lista  janë gjërat pa tē cilën  shtëpia  nuk bën  dot.

Për shembull tek Pastrimi

  • Uthull
  • Ilaç enesh
  • Ilaç rrobash pluhur
  • Ilaç rrobash lëng
  • Klor
  • Letër  higjienike
  • Sfungjer dhe copë pastrimi
  • Ilaç shumë përdorimësh

Po kaq, sigurisht  ju keni  nevojat tuaja  dhe lista juaj  do të jetë  ndryshe. Por sigurohuni  që të shkruani  veç  të domosdoshmet. Kjo të ndihmon  të kesh kontroll! Sa më shumë  planifikon  aq më shumë do të jesh  i lirë  të bësh  atë  që do!

Do të  dish më shumë mbi  pastrimin?

Në autobus – Trishtimi

Shtypemi  dhe ngjeshemi, betohem  se nuk rri  kaq  gjatë  përqafuar  as me personin e dashur. Intimiteti deformohet. Gjendesh ngjitur me një të panjohur,  ndjen  frymën e tjetrit në qafë , mbështetesh  tek shpatulla  e tetës, e cila mirëkupton. Shkrihen qeniet  tona. Nuk kuptohet  ku fillon  shpirti im  e ku mbaron i tjetrit.
Një nënë nga fshati mban një torbë të rëndë me shishe qumështi.  Fle, koka i lëkundet  rregullisht. Sa herë  frenon  mjeti, zgurdullon  sytë e më pas kthehet  ëmbël  në gjumë. Frenon  autobusi edhe një herë, e kësaj  rradhe unë bie tek torba  e qumështit. Ndjej lëngun  që tundet  e them me vete  – u bë gjalp -. I kërkoj falje  dhe nëna  hap zemrën. Më tregon  gjithë ditën e saj.

Ajo nuk ishte nënë, ishte më pak se 50 vjeçe. Ishte çuar në 3 që të milte lopët, të mbaronte punët, t’arrinte  në Tiranë. Në Tiranë e kapën policët dhe e kthyen. Nuk kishte  shitur asgjë. Ishte tmerrsisht e lodhur. Tmerrsisht e lodhur. E dëgjova, nuk dija çfarë të thoja, nuk dija çfarë  të thoja.

Stacioni im. E përshëndes. Ajo më sheh e thotë – Na iku jeta kot – mbyll  sytë  prap që të flinte.

Zbrita.  Kisha grumbulluar gjithë  trishtimin  e saj. Torba  e saj e pashitur më mbeti  mua në zemër.